Veflæg upplýsingaveita opnuð

Ráðherra opnar upplýsingaveitu

Illugi Gunnarsson mennta- og menningarmálaráðherrra opnar upplýsingaveitu. Á myndinni eru einnig Sigurjón Mýrdal formaður fagráðsins og Sólrún Harðardóttir starfsmaður þess.

Illugi Gunnarsson, mennta- og menningarmálaráðherra opnaði formlega, þann 19. mars sl., upplýsingaveitu fyrir fræðslutilboð sem ætluð eru kennurum, skólastjórnendum, kennslu-, náms- og starfsráðgjöfum í leik-, grunn-, framhalds- og tónlistarskólum.

Markmið upplýsingaveitunnar er tvíþætt: að miðla og að veita yfirsýn. Vonast er til að sem flest fræðslutilboð sem ætlað er að styrkja umræddar starfsstéttir faglega og stuðla þannig að starfsþróun þeirra verði birt á upplýsingaveitunni s.s. námskeið, fyrirlestrar, ráðstefnur, málþing og samstarfsverkefni. Með því móti verða þau aðgengileg fyrir væntanlega þátttakendur en færir einnig fræðsluaðilum og öðrum mikilvægar upplýsingar um hvað er í boði og á hvaða sviðum skortir framboð. Auðvelt er að leita í upplýsingaveitunni og eru fræðslutilboðin sérstaklega merkt útfrá skólastigum, skólagerðum, viðfangsefnum og formi kennslunnar.

Ef vel tekst til verður upplýsingaveitan fastur viðkomustaður skólafólks í nánustu framtíð. Fræðsluaðilar munu setja þar inn efni endurgjaldslaust. Til að byrja með verða það háskólarnir sem mennta kennara sem setja inn efni en öðrum gefst kostur á að bætast í hópinn á næstunni.

Fagráð um símenntun og starfsþróun kennara stendur að upplýsingaveitunni. Fagráðið var sett á fót haustið 2012. Stofnun þess kemur í kjölfar vinnu samstarfsnefndar um símenntun kennara sem hóf störf sumarið 2011. Markmið fagráðsins er að vinna að verkefnum á sviði símenntunar og starfsþróunar kennara og skólastjórnenda á leik-, grunn- og framhaldsskólastigi auk tónlistarskóla.

Upplýsingaveitan er staðsett hér á vef fagráðsins. SKOÐA

Hluti fagráðsins fylgist með: Steinunn Inga Óttarsdóttir, Ársæll Guðmundsson, Guðmundur Engilbertsson, Klara E. Finnbogadóttir og Ragnheiður Stefánsdóttir

Hluti fagráðsins fylgist með: Steinunn Inga Óttarsdóttir, Ársæll Guðmundsson, Guðmundur Engilbertsson, Klara E. Finnbogadóttir og Ragnheiður Stefánsdóttir